ILOILO CITY – 25 sa 180 ka mga barangay sa Iloilo City ang makabenepisyo sa idonar nga 10,000 cubic meters ukon 10 million liters sang potable water ukon sarang nga mainom nga tubig sang Bombo Radyo Philippines Foundation Incorporated kag Flowater Resources Iloilo Incorporated.
Ang tubig ang halin sa planta sang Flowater Flowater Resources Iloilo Incorporated sa Barangay Nanga, Pototan, Iloilo.
Sa interview sang Bombo Radyo kay Engr. Niel Ravena, pinuno sang General Services Office sang Iloilo City Government, iya ginpahayag nga ginlimpyuhan na ang mga water tanker nga amo ang gamiton sa pag-deliver sang tubig.
Suno kay Ravena, anom ka mga 10 cubic meters sang water tanker ang gamiton sa pag-deliver sang tubig sa nagkalain-lain nga distrito sa syudad.
Ini nga tubig ang libre nga ipanagtag sa mga nagakinhanglan nga pumuluyo sang syudad.
Nahibaluan nga ginpaidalom na ang Iloilo City sa state of calamity bangud sa water shortage.
