Nagdangat sa 25 ka mga basiyo sang armas-luthang ang nakit-an sa rest house sang kilala nga negosyante sa Mina, Iloilo, matapos ini nga ginpaarakan-tiro sang wala makilal-an nga mga tawo sa iya poultry farm.
Ang biktima amo si Teodoro “Tikboy” Camarista, 66, residente sang Amiroy, Mina.
Sa interview sang Bombo Radyo kay Police Captain Ma. Rosario Miranda, hepe sang Mina Municipal Police Station, iya ginpahayag nga ang 25 ka bala ang ginalakipan sang nagkalain-lain nga armas.
Suno kay Miranda, may yara sang bala nga naghalin sa 45 caliber samtang may nakuha man nga bala sang 9mm shot gun.
Ginpahayag man sini nga nag-retaliate man si Camarista gamit ang iya nga caliber 45 nga armas samtang ini ang ginapaarakan.
Gintumod man sang otoridad nga wala man sang kontra sa palibot ang biktima,.
Samtang sa bahin sang politika, indi pa ma-establisar sang kapulisan kon election-related ang natabo bangud wala man naka-file sang kandidatura si Camarista.
Ginsaysay man sang kapulisan nga ginaalegar sang biktima nga ginsaka siya kag gintiro sang indi magnubo sa duha ka mga tawo.
