Ginakabig sang pila ka mga pumuluyo sang Canada nga indi makakilibot ang pag-resign ni Canadian Prime Minister Justin Trudeau bilang lider sang Liberal Party kag pagpanaog sini sa pwesto bilang prime minister.
Sa interview sang Bombo Radyo kay Valen Jude Jambaro, Bombo Internartional Correspondent sa Canada, iya ginpahayag nga sang nagligad nga mga binulan, una na nga ginaduso sang mga Canadians nga magpanaog si Trudeau sa pwesto bangud diskontento na sila sa pagpamahala sini.
Suno kay Jambaro, luwas sa mga tawo nga nagapabor sa iya pag-resign, ginaduso man siya sang iya kapartido sa Liberal Party.
Ginpahayag man sini nga mabudlayan na si Trudeau sa pagpadayon sang iya nga tinutuyo kon ang iya mismo partido ang wala na sang salig sa iya.
Gin-athag man sang natungdan nga ang panan-awan sang kadam-an sa Liberal Party ang tam-an na gid ka nubo nga nagapakita nga mahimo indi na siya magdaog sa masunod nga eleksyon sa Oktubre.
Lakip man sa mga rason sang resignation sini amo ang threat ni US President-elect Donald Trump nga pagpataas sang 25% nga taripa sang import goods halin sa Canada padulong sa Estados Unidos.
Nahibaluan nga 11 ka tuig nga ginpangunahan ni Trudeau ang Liberal Party kag siyam ka tuig naman sa pwesto bilang prime minister antes sini ginpaguwa ang desisyon.
