ILOILO CITY – Mahimo pa nga madugangan ang 25 ka mga barangay sa syudad sang Iloilo nga wala nakapasar sa ginpatigayon nga validation may kaangtanan sa Oplan Hawan.
Sa interview sang Bombo Radyo kay Roy Defiño, pinuno sang Department of Interior and Local Government -Iloilo City, iya ginpahayag nga 120 pa lang ka mga barangay ang napaidalom sa validation.
Suno kay Defiño, ang validation team ang ginabug-usan sang tiglawas sang nasambit nga ahensya, Philippine National Police, Bureau of Fire Protection kag Public Safety and Transportation Management Office.
Ginpahayag ni Defiño nga ginkasugtan sadto sa pagsinapol nga ang validation ang umpisahan antes pa man ang Dinagyang Festival.
Makabig nga failure ang pagpanghawan sa isa ka barangay kun santo sa assessment, mas manubo sa 70% ang nakuha nga grado sa oplan Hawan nga mandu ni Presidente Rodrigo Duterte.
Paagi sa Memorandum Circular no. 2020-027 nga pirmado ni Sec. Eduardo Año, ginahatagan sang 75 ka adlaw nga plaso ang mga barangay nga wala nakapasar kag kun mapaslawan, pasakaan sang kaso administratibo ang elected officials.
Wala naman ginhingadlan sang natungdan ang mga barangay nga failure sa Oplan Hawan bangud nga nagapadayon pa ang validation sang tatlo ka team.
