ESTANCIA, ILOILO – Isa ka 27-day old nga baby boy ang pinakabata nga COVID-19 positive sa Estancia, Iloilo.
Sa interview sang Bombo Radyo kay Rodoel “Butching” Aclaro, Municipal Administrator sang Local Government Unit sang Estancia, iya ginpahayag nga ang nasambit nga lapsag ang residente sang Brgy. Bulaqueña.
Ang lalaki nga lapsag suno kay Aclaro ang nagapabilin nga asymptomatic kag yara sa Ligtas COVID Center sa nasambit nga banwa.
Ang lapsag ang nalakip sa Local COVID-19 cases sa Estancia.
Magluwas diri, may isa man ka bulan nga lapsag nga babayi nga nagpositibo sa COVID-19 sa nasambit man nga banwa.
Ginpahayag ni Aclaro nga residente sang Brgy. Paon ang nasambit nga lapsag nga una nga gindala sa district hospital sang Balasan, Iloilo bangud nga nabudlayan ini sa pagpamuhin.
Gin-refer naman sa Western Visayas Medical Center sa syudad sang Iloilo ang lapsag kag nagnegatibo sa una nga COVID-19 test.
Sang manugguwa na sa hospital ang lapsag, liwat ini nga ginkuhaan sang swab sample para sa COVID-19 test apang nagpositibo ang resulta.
Sa subong, nagapabilin nga asymptomatic ang pasyente kag yara sa quarantine facility sang Estancia.
