ILOILO – Naglab-ot sa 27 ka mga anay miyembro sang Revolutionary Proletarian Army- Alex Bungcayao Brigade (RPA- ABB) ang nakatapos na sang ila basic military training.
Sila ang ginalauman nga mangin kabahin na sang Peace Development Communities sa Western Visayas.
Sa interview sang Bombo Radyo kay Capt. Cenon Pancito III, spokesperson sang 3rd Infantry Division sang Philippine Army, katuyuan sang Philippine Army nga ipaidalom sila sa training kag ibalik sila sa ila komunidad agud mangin kabahin sang territorial defense.
Dugang pa ni Pancito, sila ang makabulig man sa pagpadayon sang kalinong kag katawhay kag ila man ma-proteksiyunan ang ila tagsa ka lugar batok sa mga rebelde.
Bangud nga sila ang ginpaidalom sa de-militarization, suno kay Pancito, ginkuha ang ila nga mga armas kag ginbayluhan sang high powered firearms ukon mga M16 rifle.
Ginpaidalom man sila sa training sa diin sila ang gintudluan sang mga pinaagi sang pagpakig-away nga lain sa ila natun-an sang sila ang miyembro pa sang rebelde nga grupo.
Suno pa kay Pancito, indi sila makabaton sang sweldo pareho sa ginabaton sang mga regular nga miyembro sang Philippine Army apang makabaton sila sang allowance.
Pahayag sang natungdan, ini ang ‘kaangay nga naga-volunteer sila’ kag ang isa pa gid sang benepisyo amo nga hilway sila kag malapit sa ila nga pamilya.
Nahibaluan nga ang 27 ka mga miyembro sang RPA-ABB ang kabahin sang Maasin Cluster, isa sa walo ka Peace Development Communities, sa diin may isa sa Iloilo, isa sa Aklan kag ang iban ang nahamtang sa probinsya sang Negros.
“SA TION NGA MAGBALIK.”
Samtang, nagakahangawa naman ang iban sa publiko nga apisar natapos na sang mga anay miyembro sang RPA-ABB ang ila basic nga military training, posible pa nga magabalik sila sa ila daan nga hilikuton.
Bilang sabat, ginpahayag ni Pancito nga kumpiyansa ang Philippine Army nga sila ang magapabilin nga loyal sa gobyerno.
Ini bangod man sa ila nga training kag sa mga ginpahanumdom sa ila sang ahensya.
Suno kay Pancito, sa tion nga madakpan ang mga ini nga nagbalik sa armado nga grupo, sila ang maga-atubang sang nagakaigo nga kaso.
