ILOILO – 27 ka mga personnel sang Iloilo City Police Office (ICPO) ang ginakabig nga naka-close contact sang duha ka COVID-19-positive nga mga pulis sa syudad sang Iloilo.
Sa interview sang Bombo Radyo kay Pol. Capt. Shella Mae Sangrines, tagpamaba sang Iloilo City Police Office, iya ginpahayag nga lunsay napaidalom na sa reverse transcription polymerase chain reaction (RT-PCR) test ang amo nga mga personnel.
Sa subong, sila ang naka-facility quarantine.
Ginpahayag man sang natungdan nga wala na nakakadto sa Mandurriao Police Station sanday WV 149 kag WV 151 bangud nadesignar ang mga ini sa gwa sang Western Visayas Medical Center (WVMC) kag sa gwa sang isa ka hotel nga ginagamit nga quarantine facility sang mga repatriates.
Apisar sini, ginpaidalom man sa swab test ang 54 ka organic personnel sang nasambit nga police station, apat ka non-uniformed personnel kag isa ka police lieutenant.
Ini agud mapat-od lang ang ila nga status bangud sila man ang padayon nga nagaserbe bilang frontliners.
Sa subong, suno kay Sangrines, wala pa man sang direktiba kaangot sa pagpauntat sang operasyon sang Mandurriao Police Station.
SA BAHIN SANG BARANGAY…
Lima ka tawo ang naka-close contact sang isa ka COVID-19 positive nga pulis sa iya ginatiniran nga barangay sa distrito sang La Paz.
Nagpangabay ang punong barangay nga indi lang paghingadlan ang ila lugar bangud sang pila ka ginahalungan nga impormasyon.
Sa interview sa Bombo Radyo sa amo nga punong barangay, iya ginpahayag nga gilayon sila nga nagpatigayon sang contact tracing matapos nabaton ang impormasyon nga nagpositibo ang pulis.
Sa subong, ang close contacts ang napaidalom na sa home quarantine kag ginalauman nga pakuhaan naman sang swan sample subong nga adlaw ukon anuman nga adlaw subong nga semana.
Gin-disinfect naman ang balay nga ginapuy-an ni WV 149.
IBAN PA NGA GIN-SWAB TEST
Samtang, gin-athag naman ni Iloilo City Mayor Jerry Treñas nga INDI LUNSAY CLOSE CONTACTS sang duha ka COVID-19 positive nga mga pulis ang ginkuhaan sang swab sample sa Mandurrio Gym kahapon, Hunyo 17.
Suno kay Treñas, ang mga pedicab drivers, maket vendors, tricycle drivers kag iban pa nga pumuluyo nga ginpaidalom sa COVID-19 test ang nag-avail lang sa programa sang Iloilo City Government para sa mass testing.
Gin-ulayhon lang sila suno kay Treñas kag wala sang dapat kabalak-an ang mga pumuluyo kun nagpauli man ang ini sa ila balay. #
