MANILA – Ginpahanugutan na nga makasakay sa barko ang kapin sa 30 ka Ilonggo Locally Stranded Individuals nga yara sa Manila North Harbor Port.
Ini matapos nga nabaton na sang shipping company nga 2Go ang ila requirements agud nga makasakay sa barko.
Sa interview sang Bombo Radyo kay Mary Grave Escamilla sang Guimbal, Iloilo, iya ginpahayag nga ang ila byahe ang natalana buwas nga adlaw, Oktubre 21, apang ini ang nakadepende pa bangud sa epekto sang bagyo.
Suno kay Escamilla, 27 sila ang magapa-uli sa Iloilo apang may pila pa ka mga Ilonggo nga magapabilin bangud sa kakulang sang letter of acceptance kag bangud nga may yara sang existing moratorium sa ila lugar.
Ginpahayag ni Escamilla nga sa subong, mas naggutok pa gid sa port matapos ginkansela ang pila ka byahe bangud sa weather disturbance kag nagdugang man ang numero sang mga nag-abot nga Locally Stranded Individuals.
Kasubong nga nabuhi-an sila sang paglaum nga makapauli bangud nga may approval na gikan sa shipping company nga mahimo na sila nga makasakay sa barko.
Kadungan sini, ginpasalamatan man sang natungdan ang tanan nga organisasyon kag indibidwal nga nagpalab-ot sang bulig sa ila kasubong sang pagkaon kag hygiene kits.
