ILOILO – Naglab-ot sa 280 ka pulis ang ginpaidalom sa training may kaangtanan sa pagpatuman sang Republic Act 7183 ukon An Act Regulating the Sale, Manufacture, Distribution and Use of Firecrackers and other Pyrotechnic Devices.
Sa interview sang Bombo Radyo kay Police Lt. Col. Neil Gumana, pinuno sang Regional Civil Security Unit 6, iya ginpahayag nga ang training ang ginpatigayon sang Disyembre 6 ka 12 nga may katuyu-an nga ipahangop ang kaundan sang nasambit nga layi.
Suno kay Gumana, kinahanglan nga mahangpan sang mga police personnel kun ano ang ginapahanugutan kag ang ginadumili-an sa paggamit sang firecrakers lakip na ang authorized kag unauthorized nga pagpalupok, diin ang designated area agud nga makapalupok kag kun diin mahimo nga makabaligya sang palupok.
Ginpahayag ni Gumana nga kinahanglan man nga mahangpan sang police personnel kun ano ang mga nagakaigo nga silot para sa mga violator.
Nahibalu-an nga may kaangtanan sa nasambit layi, may yara sang existing nga executive order si Presidente Rodrigo Duterte agud nga mahagan-hagan ang biktima sang palupok sa pungsod.
