Turismo sa rehiyon, indi apektado sang Marawi Seige

ILOILO CITY – Wala sang masyado epekto sa turismo sang Rehiyon 6 ang nagakatabo sa Marawi City.
Sa interview sang Bombo Radyo kay Atty Helen J. Catalbas, Regional Director sang Department of Tourism Region 6, ginpahayag sini nga wala masyado epekto ang mga travel advisories sang iban nga pungsod sa rehiyon tungod kadamuan sang mga turista sa rehiyon ang ginakabig nga domestic tourists.
Suno kay Catalbas, 80% sang mga turista sa rehiyon ang makabig domestic tourists ukon diri man halin sa Pilipinas.
Ini man ang bunga sang Experience Western Visayas First nga kampanya sang umpisa nga nagpungko si Catalbas suno diri bilang Regional Director sang ahensya.
Samtang nasat-uman naman sang ahensya ang paghina sang tourist reservations sa isla sang Boracay nga ila naman planu nga solbaron sa masunod nga semana.
Suno kay Atty Catalbas, ini man ang isa sa mga pagatalakayon sini sa mga hotel and restaurant owners sa isla.
Indi na bag-o pa suno kay Catalbas ang sitwasyon sa diin sang 2013 matapos ang pag-igo sang Supertyphoon nga Yolanda, naapektuhan man ang tourist reservations kag arrivals apang napangitaan man nila ini sang pamaagi sa diin ginpanubo sadto ang mga rates sa reservations sang mga hulot sang mga hotels sa sa Isla sang Boracay.
Kadungan naman sang nanotisyahan nga pagdamu sang mga local tourist spots sa rehiyon, nagaplano ang Regional Director sang Department of Tourism Region 6 nga hingyuon ang mga pamunuan sang mga ini nga mas paayuhon pa gid ang serbisyo sa mga local tourists.
Gindugang pa ni Atty. Catalbas nga nagakadapat nga may nagakaigo nga pag-amoma sa mga turista nga nagapadulong sa mga bag-o nga mga tourist spots sa palibot sang rehiyon.
Ginpahanumdom naman sang DPT 6 Regional Director nga mahimo man makapangayo sang discount sa mga DOT-accredited establishments sa rehiyon ang mga turista.