ILOILO CITY – Nadakpan sang mister ang misis sini nga nagsulod sa isa ka pribado nga kuwarto sa beach resort sa Barangay Sto. Nino Norte, Arevalo, Iloilo City kagab-i.
Sa interview sang Bombo Radyo Iloilo, ginpahayag ni S/Insp. Jose Val Ladublan, chief of police sang Arevalo Police Station, nagpangayo sang bulig sa ila ang mister nga ginhinago lang ang pangalan.
Pag-abot sa beach resort, nakita sang mga otoridad ang 37-anyos nga bana nga nagabantay sa guwa sang nasambit nga resort kag ginpahayag nga sa sulod ang iya asawa nga job hire sa isa ka ahensiya sang gobyerno, upod ang ginapahayag lalaki sini.
Kapin tatlo ka oras ang paghulat sang bana sa guwa sang resort antis nagguwa ang misis kag ang kaupod nga lalaki.
Suno sa mister, gikan sa city proper, ginpasundan na sini ang asawa kag nakita nga nagsakay sa motorsiklo ang misis sini kaupod ang lalaki padulong sa isa ka beach resort.
Nanuktok pa ang bana sa kuwarto nga ginsudlan sang asawa apang sang ginbuksan kag makita ang bana, nagsulod ini liwat sa kuwarto.
Sunod naman nga nagguwa sa kuwarto ang ginapahayag lalaki ni misis kag gin-istorya pa ang bana nga indi ini pagsakiton kun sila ang magguwa sa kwarto.
Depensa naman sang misis, wala sila sang relasyon sang lalaki kag nag-upod lang siya diri agud magmasahe bangud naga-sideline siya bilang masahista.
Nagdesisyon naman ang bana nga indi na pagkasuhan ang asawa kag liwat ini nga ginbaton.