ILOILO – Lunsay mga repatriated Overseas Filipino Workers (OFWs) ang duha ka bag-o nga kaso sang coronavirus disease 2019 (COVID-19) sa Western Visayas.
Santo sa COVID-19 Case Bulletin Number 48 sang Department of Health (DOH) Western Visayas Center for Health Development, ang duha amo ang mga masunod:
- WV 98 — 35 anyos, lalaki, residente sang Valladolid, Negros Occidental; kag
- WV 99 — 27 anyos, lalaki, residente sang Bago City, Negros Occidental
Ang duha ang nakapaidalom sa facility quarantine.
Base man sa amo nga case bulletin, tatlo ang nagdugang sa recoveries sa rehiyon kag sila ang lunsay man mga repatriated OFWs. Sila amo ang mga masunod:
- WV 68 — 30 anyos, lalaki, residente sang distrito sang Jaro;
- WV 70 — 29 anyos, lalaki, residente sang distrito sang La Paz; kag
- WV 71 — 30 anyos, lalaki, residente sang distrito sang Jaro
Sa kabug-usan, naglab-ot na sa 99 ang numero sang COVID-19 cases sa Western Visayas, 42 ang recoveries, kag pulo ang patay.
Yari ang numero sang COVID-19 cases sa tagsa ka lugar sa rehiyon: anum sa Aklan, 14 sa Antique, lima sa Capiz (duha ang patay), 18 sa Iloilo Province (apat ang patay), duha sa Negros Occidental, siyam sa Bacolod City (tatlo ang patay), 16 sa Iloilo City (isa ang patay), kag 29 ang nagpositibo sa repatriates. #
