OTON, ILOILO – Na record ang ika-duha nga COVID-19 casualty sa Oton, Iloilo.
Ini ang ginkumpirma sa Bombo Radyo sang COVID-19 focal person sang Local Government Unit sang Oton nga si anay SB Member Jafet Salinas.
Suno kay Salinas, ang pasyente nga ginbawi-an sang kabuhi amo ang 37 anyos nga lalaki nga may yara na nga daan sang comorbidity kag ginbawi-an sang kabuhi sa isa ka hospital sa syudad sang Iloilo.
Ginpahayag ni Salinas nga ang pasyente ang masami nga nagapadulong sa hospital agud nga magpa-dialysis.
Sang Setyembre 2, ginkuhaan sang swab sample para sa COVID-19 test ang pasyente, sang Setyembre 5 sang nakumpirma nga nagpositibo sa virus kag sang Setyembre 12 lang ginbawi-an sang kabuhi.
Ginabanta duha tubtub tatlo ka himata sang pasyente ang naka-home quarantine kag ginahulat pa ang resulta sang ila COVID-19 test.
Sa subong, ang Oton ang may 108 na ka total COVID-19 cases kun sa diin 10 ang active kag 96 naman ang naka-recover.
May kaangtanan diri, ginbuksan na ang Municipal Health Center sang nasambit nga banwa epektibo subong nga adlaw, Setyembre 14.
Matandaan nga ginpasirado ang Municipal Health Center sa sulod sang halos isa ka semana matapos nga isa ka health worker ang nagpositibo sa COVID-19 nga close contact sang isa ka COVID-19 positive.
