ILOILO CITY- Nagtawhay na ang sitwasyon sang mga pumuluyo nga nagpadulong sa Iloilo Convention Center para sa ila scheduled nga vaccination subong nga adlaw.
Sa interview sang Bombo Radyo kay Police Major Jose Mark Anthony Gesulga, hepe sang Mandurriao Police Station, iya ginpahayag nga ila ginpreparahan ini sang maayo matapos nga naka-eksperyensiya sang madamo nga problema kahapon kaangay sang wala nasunod nga physical distancing.
Suno kay Gesulga, ginpahamtangan nila sang bastante nga bangko ang registration area, screening area, vaccination area kag monitoring area sa diin may antad gid nga halos tag-duha ka metros ang kada bangko agud masunod ang physical distancing.
Ginpanugyanan naman ni Gesulga ang tanan nga katapo sang PNP nga naga- assist sa mga tawo nga nagapabakuna nga i-apply gid ang maximum tolerance ilabi na kon may yara sang mga tawo nga nagareklamo bangud sa malawig nga paghulat.
Matandaan nga sa una nga adlaw sa paggamit sa Iloilo Convention Center bilang vaccination site kahapon, wala natuman ang physical distancing bangud sa pagdinaguso sang mga tawo ilabi na ang mga wala nga nagpadulong sa site apisar nga indi pa nila schedule sa vaccination.
