SARA, ILOILO – Nagapanindugan ang 2nd Iloilo Provincial Mobile Force Company nga nag-una palupok sang armas ang 26 anyos nga lalaki nga napatay sa checkpoint sa Brgy. Zerrudo, Sara, Iloilo.
Ang biktima amo si Adonis Hontiveros Jr., 26, sang Ajuy, Iloilo.
Sa interview sang Bombo Radyo kay Pol. Lt Col. Mario Baquiran Jr., commander sang 2nd Iloilo Provincial Mobile Force Company, iya ginpahayag nga namutikan ni Hontiveros nga may checkpoint nga ginapatigayon gani gilayon ini nag U-turn.
Ginlagas si Hontiveros sang tatlo ka mga pulis nga sanday Patrolman Christopher Paclibar, Police Corporal John Michael Parsia kag Police Corporal Alfredo Bartulo.
Bangud sini, nagpalupok sang armas si Hontiveros kag gintiro si Patrolman Paclibar nga nagserbe spotter apang wala naigo.
Nagbalos tiro sanday Corporal Parsia kag Corporal Bartulo sa diin naigo sa dughan si Hontiveros.
Nakuha kay Hontiveros ang 45 caliber pistol.
Sa subong, gin-relieve na sa pwesto ang tatlo ka mga pulis kag yara sa kustodiya sang Sara Municipal Police Station.
Una na nga ginpahayag sang kaupod ni Hontiveros sa motorsiklo nga si alyas Boy nga wala naka-uniporme ang tatlo ka mga pulis sang natabo ang checkpoint.
