Pormal na nga nagtakop subong nga adlaw ang 2nd National Mission Congress.
Sa interview sang Bombo Radyo kay Msgr. Bong Lo, National Director sang Pontifical Mission Societies Philippines, iya ginpahayag nga ang kahiwatan ang nag-umpisa sang Abril 17 kag nagtakop subong nga adlaw bilang kabahin sang 500 Years nga selebrasyon sang Christianity sa pungsod.
Ini ang weeklong event nga may tema nga “Gifted to Give” kag gin-organize sang Catholic Bishops Conference of the Philippines (CBCP) kaupod ang Episcopal Commission on Mission nga amo ang nagapamuno sa commission, kag suportado sang Archdiocese of Cebu, Basilica Minore del Sto. Niño de Cebu, kag Dominus Est and Couples for Christ.
Ang Congress nga amo ang patimaan sang pagtakop sang ‘Year of Missio Ad Gentes’ ukon final theme sang 500 Years of Christianity, ang gintunga sa duha ka bahin nga amo ang International Missiology Symposium kag National Mission Forum.
Nangin speaker naman sa ginpatigayon nga National Mission Forum si His Eminence Cardinal Luis Antonio Tagle,Prefect of the Congregation for the Evangelization of Peoples.
Ang iban pa nga speaker amo si Bishop Pablo Virgilio David sang Diocese of Kalookan kag presidente sang CBCP.
Ang weeklong celebrations ang nagtakop sa Divine Mercy Sunday, kag ginpatigayon sa Cebu Metropolitan Cathedral sa diin ang presider amo si Bishop David, kag gin-concelebrate ni Archbishop Charles John Brown, Apostolic Nuncio to the Philippines.
