ILOILO CITY – Wala nalikop sa tagtaganay sang ikaduha nga hugnat sang Social Amelioration Program (SAP) cash aid ang tanan nga benepisyaryo sa Brgy. Lopez Jaena Norte, La Paz, Iloilo City.
Sa interview sang Bombo Radyo kay Punong Brgy. Marjorie Gregorios, iya ginpahayag nga subong nga adlaw, Hulyo 26, ang schedule sang ila barangay apang sa ginabanta kapin 500 ka benepisyaryo, wala gani katunga ang nahatagan sang ayuda.
Suno kay Gregorios, may ginpatigayon pa nga cross-matching kag double-checking ang Department of Social Welfare and Development (DSWD) Region VI rason nga nadelay ang cash aid para sa iban.
Ini agud masigurado nga indi na makabaton sang ayuda halin sa DSWD ang tanan nga benepisyaryo sang cash aid sa iban nga ahensya sang gobyerno kaangay sang Social Security System (SSS) kag Department of Labor and Employment (DOLE).
Wala naman sang mapasalig nga petsa ang punong barangay kun san-o ihatag ang ayuda.
LOPEZ JAENA SUR, LAPAZ
Nagalibog naman ang ulo ni Punong Barangay Johny Lego sang Barangay Lopez Jaena Sur, La Paz, Iloilo City kun ngaa sala sa gihapon ang paglista sang pangalan sang mga benepisyaryo apisar madugay na nga napasa sang barangay ang masterlist.
Natalana nga mabaton sang mga benepisyaryo sang amo nga barangay ang social amelioration cash aid sa Mierkules, Hulyo 29.
Apang suno sa punong barangay, 15 lang ka tawo ukon 7% sang mga benepisyaryo ang nalista sa iya barangay samtang ang 93% ang yara nagtupa sa sa iban nga barangay.
Gintawag man ni Lego nga ‘incompetent’ ang encoder sang DSWD.
Nagpanawagan si Lego sa mga personnel sang ahensya nga kay-uhon ang trabaho agud indi magtupa sa mga opisyal sang barangay ang pagpamasol sang mga pumuluyo.
