Makaluluoy ang gindangatan sang isa ka manghod sa kamot sang iya magulang sa Sitio Narra, Barangay Nuing, Jose Abad Santos, Davao Occidental.
Ini matapos ginlugos kag ginpatay sang 17-anyos nga solterito ang 3-anyos nga manghud nga babaye.
Ginkilala sang kapulisan ang biktima nga si alyas “Mary,” samtang ang suspek amo si alyas “Boyax.”
Base sa imbestigasyon sang Jose Abad Santos PNP, hubog ang suspek sang nagpauli ini sa ila balay kag naabtan ang iya manghod nga nagaisahanon.
Gindala niya ini sa pugon sang kopras kag didto ginhimuslan kag ginpatay.
Suno sa mga testigo, may mga kaingod nga nakakita nga upod ang bata sa iya magulang, apang wala nila ginpanumdum nga himuan sang kalain.
May mga nakabati man sang hibi sang bata nga daw nagapangayo sang bulig, apang sang ginkadtuan, nakita nila nga patay na ini kag wala na sang panapton.
Nasapwan man sa lugar ang suspek nga nagasuksok lang sang underwear kag nagakatulog, nga ginapatihan resulta sang epekto sang droga.
Gindayunan sang mga residente ang pagsumbong sa mga otoridad kag gilayon nga gin-aresto ang suspek.
Sa interogasyon, gin-ako sang suspek nga iya ginlugos kag ginpatay ang iya manghod.
Ginpahayag man nga yara siya sa impluwensya sang illegal nga droga sang natabo ang krimen.
Yara na sa kustodiya sang kapulisan ang suspek kag natalana nga mangatubang sang sampaw-sampaw nga mga kaso.
