Ginbawian sang kabuhi ang tatlo ka mga babaye nga yara sa higad sang dalan sa Barangay Pungtod, Cabatuan, Iloilo matapos aksidente nga nabungguan sang isa ka awto.
Ang mga biktima amo sanday alias Alberta, 72, residente sang Barangay Tabucan, Cabatuan; alias Fely, 58, residente sang Barangay Ayaman, Cabatuan; kag si alias Heide, 59, residente sang banwa sang Lambunao.
Ang driver naman ang naga-edad sang 20-anyos nga halin sa Pavia kag pakadto sa Maasin.
Sa interview sang Bombo Radyo kay Police Lt. Veto Bastiero, Jr., Deputy Chief of Police sang Cabatuan Municipal Police Station, iya ginpahayag nga santo sa alegasyon sang driver, napiyungan ini samtang nagadala sang salakyan.
Nahulog ang awto sa highway, kag sang pabalik na ini sa dalan suno kay Bastiero, nasalakay na sini ang mga biktima. Duha sa mga babaye ang nagalakat-lakat sang amo nga tion, samtang isa naman ang nagapamulot sang basura.
Bangud sa impact, nahulog pa gid ang salakyan sa kanal rason nga nabuka kag naguba ang unahan nga parte sini.
Suno kay Bastiero, nagpaathag ang driver nga napiyungan siya bangud kaagahon na ini natapos sa iya trabaho kag may hingabutan pa nga obra sa Maasin.
Ginpaidalom man sa medical examination ang driver bangud sa naangkon man sini nga pilas kasunod sang aksidente.#
