BANATE, ILOILO – Nagpaguwa na sang executive order si Mayor Carlos Cabangal sang Banate, Iloilo agud nga indi anay makapadayon sa pagnegosyo ang isa ka pamilya nga Chinese nga nagbakasyon halin sa China.
Ini ang kasunod sang report nga nabaton sang alkalde nga may isa ka pamilya nga ginalakipan sang duha ka anak kaupod ang ila iloy nga nagbakasyon sa China kag nagpauli sa nasambit nga banwa.
Sa interview sang Bombo Radyo kay Cabangal, iya ginpahayag nga ang tatlo ang nakabatyag sang paglain sang pamatyag rason nga kinahanglan nga ipaidalom sila sa quarantine.
Suno kay Cabangal, ginpanugyanan man ang tatlo nga indi anay magbukas sang ila One Stop Shop agud nga indi makalaton sa mga customer.
Ginpahayag ni Cabangal nga sa subong, ginpaidalom anay home quarantine ang mga natungdan samtang gina-obserbahan ang ila ikaayong lawas.
