Ginatinguhaan sang mga barangay official nga masunod ang tatlo lamang ka-adlaw nga pagpatigayon sang haya sa syudad sang Iloilo.
Matandaan nga kasunod sang pagpaidalom sa syudad sang Iloilo sa Modified Enhanced Community Quarantine (MECQ) status, nagpapanaog sang executive order number 53 series of 2021 si Iloilo City Mayor Jerry Treñas sa diin nasaad nga ginalimitahan ang pagpatigayon sang haya sa tatlo lamang ka-adlaw.
Ginalimitahan man sa immediate nga mga myembro sang pamilya ang pagtambong pati na sa lubong.
Sa interview sang Bombo Radyo kay Punong Barangay Peter Abadiano sang Zamora Melliza, Iloilo City Proper, iya ginpahayag nga, pila sa iya mga pumuluyo nga napatyan sang himata amo ang tuman ka pigado.
Suno kay Abadiano, isa ini ka rason kun ngaa indi manegar nga nagakadelay ang pagpalubong sang bangkay sang isa ka patay sa diin, masami nga kulang pa ang budget sang pamilya.
Pahayag sang opisyal, may mga bes nga nagakadugayan man ang pagpaubra sang pamilya sa pantyon sang ila himata rason nga apisar nagdangat na sa tatlo ka-adlaw, wala pa natapos ang haya.
Sa pihak sini, ginapahangop ni Abadiano sa iya pumuluyo nga nagakadapat sundon ang pagsulundan sang alkalde sang syudad kag tinguhaan nga mapalubong gilayon ang bangkay sang himata nga nagtaliwan kag likawan ang mass gathering sa haya kag lubong.
Samtang, ang pagproseso sang death certificate kag iban pa nga dokumento ang isa man sa rason sang paglawig sang haya.
Sa interview sang Bombo Radyo kay Punong Barangay John Eric David sang Barangay Veterans Village, Iloilo City Proper nga amo ang nagaserbe bilang presidente sang Association of Barangay Captains-Iloilo City Proper, iya ginpahayag nga may yara man siya sang pumuluyo nga napatyan sang himata apang indi madali-dali ang pagpalubong bangud sa problema sa pinansyal tuga sang balayran sa ospital kag iban pa nga galastuhon.
Suno kay David, masami man nagakadelay ang pagproseso sang death certificates bangud kun kaisa wala sang opisina ang mga talatapan sang gobyerno sa diin indi madali-dali hingagaw ang papeles para sa napatay nga himata.
Bangud sini, gin-abisuhan ni David ang iya pumuluyo nga indi lamang anay pagkuhaon sa punerarya ang bangkay sang himata sa tion nga wala pa nahitso ang dokumento kag iban pa nga proseso sang pagpalubong.
