ILOILO CITY – Nagpositibo ang kapin 3 ka mga empleyado sang compliance team sang COVID-19 sang Iloilo City Government.
Sa exclusive interview sang Bombo Radyo kay Jeck Conlu, spokesperson sang COVID-19 Team sang Iloilo City Government, iya ginpahayag nga gilayon nga gin contact trace, kag gin-isolate ang mga empleyado nga na-infect sang nasambit nga virus.
Suno kay Conlu, posible nga nakuha sang mga nasambit nga empleyado ang virus sa field sa diin naka-assign nga magpangsaway sa mga pumuluyo.
Pahayag sang natungdan, wala naman nadugangan pa ang kaso sang COVID-19 sa mga empleyado sang Iloilo City Government kag indi na pag i-lockdown ang City Hall bangud yara na sa estable nga sitwasyon ang mga empleyado.
May kaangtanan naman sa ginpahayag mga empleyado sang gobyerno nga nagpatigayon sang Christmas celebration sa syudad, gin-athag ni Conlu nga wala sang may narekord nga amo nga hitabo sa ila pagtsikyar.
Nagpanugyan man si Conlu sa publiko nga likawan gid ang mga pagtililipon bangud wala sang may ginapili ang virus nga tapikan.
Bisan ang mga paghiwat sang selebrasyon sa dalanon kun Paskwa kag pagsug-alaw sang Bag-ong tuig, hugot man nga ginadumilian sang COVID-19 Team.
Lakip man diri suno kay Conlu ang mga pagvideoke sa sulod sang panimalay kag compound agud malikawan ang paglapta sang laway kag pagkapyot sang isa lamang ka mikropono.
Mahimo man suno sa natungdan nga mag report gilayon ang publiko sa mga district police station ukon magpadala sang mensahe sa social media sang Public Safety and Transportation Management Office kun may mga madakpan nga tupad balay nga nagatililipon kag videoke.
