Tatlo ka mga Ilongga nagikan sa Pavia, Iloilo ang naghatag sang dungog sa Pilipinas matapos nangin kabahin sang 25th World Championships of Performing Arts (WCOPA) nga ginpatigayon sa Disneyland, Anaheim, California, USA.
Ini amo sanday Addie Faye Pajar sang Barangay Balabag, Ma. Emma Luisa Hubag sang Barangay Anilao, Pavia, Iloilo kag Angelie Camille Guadalupe sang Barangay Purok 2.
Kabahin sila sang Santa Monica Parish Youth Choir.
Sila ang nangin kabahin sang Team Philippines 2022 kag ginbansagan nga Pavianhon Singing Trio.
Sanday Guadalupe kag Pajar ang nakakuha sang duha ka individual silver medals sa Vocal Opera kag Spokes Model categories.
Magluwas diri, nakuha man ni Guadalupe ang silver medal sa Vocal Broadway.
Gindala man pauli ni Hubag ang silver medal sa Vocal Broadway kag Song & Dance categories.
Ang WCOPA ang ginakabig nga Olympics sang performing arts sa diin ang mga aspiring performers kag entertainers halin sa masobra 70 ka mga pungsod sa kalibutan ang nagapa-indis-indis sa international recognition.
