3 ka mga manugpangisda nga Pinoy, nasamaran matapos ang water cannon attack sang China sa WPS

Ginkumpirma sang Philippine Coast Guard (PCG) ang panibag-o nga pagpang-harass nga ginhimo sang China Coast Guard (CCG) sa West Philippine Sea.

Natabo ini kahapon, Disyembre 12, sa Escoda ukon Sabina Shoal nga nahamtang 75 nautical miles ukon ginabanta 140 kilometeros halin sa Palawan nga sulod pa sa 200-nautical-mile exclusive economic zone (EEZ) sang Pilipinas.

Suno kay PCG spokesperson Commodore Jay Tarriela, 20 ka Filipino fishing boats ang ginbanggaan kag ginbombahan sang water cannon.

Ginpahayag nga ang nag-harass amo ang CCG nga may bow numbers nga “21559” kag “21562” kaupod ang iban nga sakayan sa idalom sang Chinese maritime militia (CMM).

Bangud sa high-pressure water cannon nga ginbomba sa mga sakayan sang mga Pinoy, napilasan ang tatlo sa ila samtang duha naman sa ila sakayan ang nakaangkon sang damage.

Naggamit pa gid ang CCG sang rigid hull inflatable boats (RHIBs) agud pang-utdon ang anchor lines sang Filipino vessels nga nagbutang sang ila kabuhi sa katalagman sa tunga sang mabaskog nga hampak sang balod sa kadagatan.

Nag-responde man gilayon ang PCG sa amo nga insidente paagi sa pag-deploy sang BRP Malapascua kag BRP Cape Engaño.

Apang mangin ini nga mga barko ang wala man ginpalampas sang CCG. Suno sa PCG, ginbalabagan sila kag ginpalapitan sang tatlo ka vessels sang China.

“One particularly hazardous incident occurred when CCG-23519 approached within 35 yards of a PCG vessel during nighttime navigation,” suno kay Tarriela.

Apisar sini, nakaabot sila sa mga manugpangisda kag nakahatag sang bulong, pagkaon, ice, kag iban pa nga bulig.

Nagpakig-angot man ang PCG sa government-funded fish carrier nga MV Pamalakaya agud masiguro ang safety sang mga manugpangisda samtang padayon sula sa pagpangisda.

“The PCG calls on the Chinese Coast Guard to adhere to internationally recognized standards of conduct, prioritizing the preservation of life at sea over pretensions of law enforcement that jeopardize the lives of innocent fishermen,” kabahin sang statement sang PCG spokesperson.#