ANTIQUE – Lunsay nag-angkon sang patal nga pilas sa ulo ang tatlo ka mga napatay matapos nga nahulog sa pil-as ang Ceres Bus sa Brgy. Igbucagay, Hamtic, Antique.
Sa interview sang Bombo Radyo kay Police Major Adolfo Pagharion, hepe sang Hamtic Municipal Police Station, iya ginpahayag nga ang mga napatay nga sanday Evangeline Chicano sang Brgy. Guinbangaan, Laua-an, Antique kag ang mag-iloy nga sanday Vivien Omaño kag Earl Aaron Omaño sang Brgy. Borocboroc, Belison, Antique ang lunsay nag-angkon sang head injury.
Ang iban naman sa mga sakay sang bus ang nag-angkon sang pilas kag bali sa lawas.
Ginpahayag ni Pagharion nga magkatuhay ang pahayag sang mga pasahero kag ang driver sang bus.
Suno sa mga pahayag sang survivor, madasig ang pagmaneho sang driver nga si Ramon Abellar.
Depensa naman sang driver, nadulaan sang preno ang salakyan rason nga nadagdag ini sa pil-as.
Sa subong, gina-usisa na sang otoridad ang Global Positioning System (GPS) sang bus agud nga matumod kun bala, madasig gid man ang pagmaneho sang driver.
