ILOILO CITY – Tatlo ka mga suspetsado ang nakita sang caretaker sang Crystal Beach Resort nga nagpatay kay Barangay Bakhaw, Mandurriao Punong Barangay Remia Prevendido-GregOri kahapon sang hapon sa Barangay Igcadlum, San Joaquin, Iloilo.
Sa interview sang Bombo Radyo, ginpahayag ni James Lee nga nagaluto ini sa kusina sa guwa sang rest house sang makita ang tatlo ka mga tawo nga nagsulod sa resort.
Suno kay Lee, duha ka tawo ang iya nakit-an sa guwa nga nagaserbe nga lookout samtang isa ang nakita niya nga nagsulod.
Ginpahayag sang caretaker nga nakasuksok sang puti nga T-shirt kag blue nga pantalon ang mga suspetsado nga naka-bonnet.
Nakita pa niya ang isa sa mga suspetsado nga may armas nga kalibre .45.
Ang bana sang punong barangay nga si Bonifacio Gregori ang nagapungko sa lamesa sa guwa malapit lang sa iya nahamtangan suno kay Lee.
Dugang pa sang natungdan, nakabati siya sang mga lupok kag sa kahadlok naghapa na lang siya.
Matapos ang linupok nagguwa man ang mga suspetsado kag naglakat.
Iya ginkadtuan ang punong barangay sa sulod sang hulot sini kag naabtan si Gregori nga duguon samtang nagapungko sa monobloc chair sa sulod sang iya kuwarto.
Hana na kuntani mag-ilis ang barangay kapitan bangud bag-o lang ini nagtakas sa dagat matapos makapaligo.
Si Punong Barangay Gregori ang utod sang ginapahayag drug lord nga si Richard Prevendido nga napatay sang nakaligad nga tuig.