Patay ang mag-asawa kag ila anak matapos nahulog sa pil-as sa Chhatrapati Sambhajinagar, Maharashtra, India.
Suno sa una nga impormasyon, nagbaisay ang 18-anyos nga anak nga lalaki nga si Kunal Chandgude kag ang iya amay tuhoy sa pagbayad sang bulanan nga installmen para sa Apple iPhone nga iya ginbakal.
Kasunod sang ila pagbaisay, nagkadto sa pil-as ang soltero sa Khavdya Dongar kag ginpahog niya ang iya ginikanan nga malumpat ini.
Pila ka oras nga ginnegosyar sang mag-asawa ang ila anak tubtob nga gintuyo sang amay nga palapitan ang iya bata kag butongon apang hinali lang, pareho sila nadulaan sang balance kag pareho nahulog sa pil-as.
Segundos lang ang nakaligad, naglumpat man ang iloy sang soltero nga nagresulta sa kamatayon nila nga tatlo.
Kasunod naman sang insidente, ginsiling sang iban nga himata nga indi iPhone ang rason sang trahedya.
Suno sa pamilya, luyag lang ni Kunal nga mahitso sang iya ginikanan ang ila relasyon kag mag-updanay sila liwat bilang pamilya gani nagkadto ini sa kilid sang pil-as agud pahugon ang iya ginikanan nga malumpat ini kun indi sila magbalikanay.
Apang, naggwa naman sa imbestigasyon sang otoridad nga sang nagligad nga tuig, gintuyo man ni Kunal nga maglumpat sa amo nga pil-as apang natigayon ini nga mapunggan.
Sa subong, padayon pa ang imbestigasyon kun ano gid ang matuod nga rason sa likod sang trahedya.
