Sta. Barbara, Iloilo – Wala pa sa gihapon madakpan sang otoridad ang tatlo ka mga preso nga nakapalagyo sa custodial facility sang Sta. Barbara Municipal Police Station.
Ang mga preso nga nakapalagyo amo sanday Bhrix Dela Cruz Sarin sang Candoni, Negros Occidental kag may kaso nga theft, Mark Armada Arca sang Brgy. Barasalon, Janiuay, Iloilo kag may kaso nga murder kag Reniel Lozada Sellarico sang Brgy. Talanghauan, Sta. Barbara, Iloilo kag may kaso nga rape.
Sa interview sang Bombo Radyo kay Police Captain Rey Pabalan, hepe sang Sta. Barbara Municipal Police Station, iya ginpahayag nga ang mga nakapalagyo nga preso ang makabig nga hangkilan.
Santo sa pagpangusisa, si Sarin ang nagpangamot sa paglukit sang alambre sa kandado sang selda.
Sang nakapalagyo ang mga preso kahapon sang aga, ginpahayag ni Pabalan nga tatlo ka mga pulis ang naka-duty.
Mahimo suno sa hepe nga ang tatlo ang nag-agi sa likod nga bahin sang police station sa diin ang naga-duty nga jail officer amo man ang naga-duty sa radio kag front desk.
Pagkapalagyo sa likod nga bahin sang police station, mahimo nga naglumpat sa kudal nga cyclone wire ang tatlo ka mga preso.
Sa subong, 85% sang personnel sang Sta. Barbara PNP ang nagapatigayon sang hot pursuit operation agud nga madakpan ang tatlo.
