Ginkakas na sa serbisyo ang duha ka pulis nga naangot sa pagluthang- patay sa negosyante nga si Delfin Britanico sang Enero 19, 2020 sa Barangay Nabitasan, La Paz, Iloilo City.
Ang duha ka pulis amo sanday Police Staff Sergeant Ricardo Cabrera Morante kag Police Corporal Joseph Andrew Poneles Joven.
Matandaan nga base sa imbestigasyon sang National Bureau of Investigation (NBI), una na gintuad ni Police Corporal Joven, nga siya mismo ang nagserbe nga driver sang Mitsubishi Adventure bilang get-away vehicle sa pagpatay kay Delfin.
Gintuad man ni Joven nga lakip man sa mga pulis nga nagpatay sa biktima amo sanday Police Staff Sergeant Morante kag Police Master Sergeant Vernie Lui Escorial.
Sa interview sang Bombo Radyo kay Police Lt. Col Arnel Solis, spokesperson sang Police Regional Office (PRO) VI, iya ginpahayag nga Marso 2020 pa sang ginkakas sa serbisyo si Morante kag Agusto 2020 naman si Joven nga una na nag-AWOL sa serbisyo ukon [absent without official leave].
Suno kay Solis, assigned naman subong sa Headquarters Support Unit sang PRO VI sanday Police Staff Sgt. Freddie Libo-on, Police Master Sergeant Escorial, kag Police Staff Sergeant Michael De Felipe nga naumalid man sa krimen.
Nahibaluan nga si De Felipe ang nalakip sa mga pangalan nga yara sa sworn statement sang state witness nga si Joven.
Sa amo nga sworn statement, ginpahayag ni Joven nga naka-upod sa salakyan si De Felipe apang wala siya nakaluthang sa biktima.
Ginpahayag nga upod man sa salakyan si Police Staff Sgt. Freddie Libo-on.
Sa subong, padayon nga naga-duty bilang pulis sanday Libo-on, Escorial kag De Felipe bangud wala pa ang mga ini napasakaan sang administrative complaint.
