Na-rescue sang Philippine Coast Guard sa Tawi-Tawi ang tatlo ka taga-Antique nga manugpangisda nga 21 ka adlaw nga nagpautaw-utaw sa kalalawran matapos ginapahayag nasagaid sang barko ang ila ginasakyan nga bangka.
Ang tatlo ka manugpangisda amo sanday Ruben Beso, Sr., 51; John Lauren Beso, 27; kag John Javellana, 34, lunsay mga residente sang Brgy. Sagua, Anini-y, Antique.
Sa interview sang Bombo Radyo kay Allen Rose Beso, anak ni Ruben Beso Sr., iya ginpahayag nga Enero 2 sang naghalin ang tatlo apang wala nakabalik kag wala man sang impormasyon nga napalab-ot sa pamilya kun sa diin na sila nakalab-ot.
Kahapon sang aga sang nakit-an sang duha ka naga-patrol nga personnel sang PCG ang tatlo ka manugpangisda sa kalalawran nga sakop sang Languyan, Tawi-tawi.
Sa inisyal nga impormasyon nga nasugid sa pamilya, nasagaidan sang barko ang bangka sang tatlo ka manugpangisda rason nga nasamad ang timon sang sakayang pandagat.
Ginpahayag ni Beso nga sa sulod sang 21 ka adlaw, wala sang nakaon kag nainom ang iya amay kag duha ka upod apang wala pa napaathag sa ila kun paano sila nakalampuwas nga wala sang husto nga pagkaon sa tunga sang lawod.
Ginproseso na sang PCG ang pagpapauli sa tatlo ka manugpangisda sa ila balay sa Antique.
