Ginkumpirma sang Office of Civil Defense (OCD) nga may tatlo ka mga persona nga na-report nga missing bangud sa epekto sang Habagat kag Bagyo Crising.
Suno kay OCD Administrator Rafaelito Alejandro IV, duha sa reported missing ang nagikan sa Antique. Isa naman ang gin-report nga nadula sa Palawan matapos gin-alegar nga nagpalawod ini bisan sang malain nga tyempo.
Ginklaro sang talatapan nga gina-validate pa ang reports nga ini.
Suno pa sa opisina, 215,000 ka mga residente sa bilog nga pungsod ang naapektuhan sang malain nga panahon halin pa sang nagligad nga inadlaw tubtub nga nagguwa na ang bagyo sa Pilipinas subong nga adlaw.
Kadam-an naman sa pinaka-apektado ang nagikan sa Negros Island kag sa Panay.
Pahayag pa sang OCD, naka-red alert ang ahensya kag may nakaplastar na nga 3-million nga balor sang family food packs nga mahimo ipadala sa local governments agud makabulig sa stocks sang relief goods.
