ILOILO CITY – Ginpanindugan sang Land Transportation Franchising and Regulatory Board (LTFRB) nga madayon ang pagpatuman sang modernization program sa mga public utility vehicles (PUVs).
Apang gin-athag sang LTFRB nga hatagan sang tatlo ka tuig nga transition period ang mga operators.
Ginpahayag sa Bombo Radyo ni LTFRB Region 6 director Richard Osmena nga ini ang ginkasugtan sa pinakaulihi nga pagsinapol sang LTFRB central office.
Suno kay Osmena, ang pagpatuman sang modernization program ang wala nagakahulugan sang gilayon nga pag-phase out sang mga daan nga jeep.
Sa sulod sang tatlo ka tuig nga transition period, hatagan sang kahigayunan ang mga operators nga maka-renew sang prangkisa apang provisional authority lamang.
Ang dalayon nga pag-phase out sang daan nga mga salakyan ang nakadepende suno sa LTFRB, sa mangin resulta sang tatlo ka tuig nga transition period.