Dakop ang tatlo ka mga lalaki samtang tatlo man ang nakapalagyo bangud sa pagpatigayon sang iligal nga pa-bulang sa Zone 1 Barangay Calumpang, Molo, Iloilo City.
Ang mga arestado amo sanday Raymer Mardelama, 35; Mark Oliver Belamala, 40 kag Ryan Khalid, 30, lunsay mga residente sang nasambit nga barangay.
Samtang na identify naman ang isa sa tatlo ka mga nagpalagyo nga amo si Ronnie Vergara.
Sa interview sang Bombo Radyo kay PLt. Col. Rene Obregon, Head sang City Intelligence Unit sang Iloilo City Police Office (ICPO), iya ginpahayag nga nakabaton sila sang report nga may yara sang nagapatigayon sang bulang sa Barangay Calumpang kag gilayon man sila nga nagconduct sang operasyon.
Suno kay Obregon, narecover nila ang lima ka mga manok, isa ka improvised ring, kag P2,337 nga cash.
Ginasiguro sang natungdan nga nakabantay ang kapulisan sa mga iligal nga ginahimo sang mga tawo sa tunga sang pandemya.
