Posible nga pasakaan sang kaso nga plunder kag kaso nga paglapas sa Republic Act 9184 ukon ‘Government Procurement Act’ ang tatlo ka mga suppliers kag anay opisyal sang Department of Budget and Management (DBM) nga naangot sa kwestyonable nga pagbakal sang gobyerno sang overpriced nga COVID-19 supplies.
Ang tatlo amo sanday former DBM officials Lloyd Christopher Lao, Warren Liong, kag Anderson Lo nga naangot sa transaksyon sa Pharmally — ang kumpaniya nga naggamit sang bogus nga addresss sa ila nga incorporation records.
Sanday Lao, Liong kag Lo ang naangot man sa pag-transfer kag disbursement sang P67 billion halin sa Department of Health (DOH) pakadto sa Procurement Service sang DBM.
Sa interview sang Bombo Radyo kay Atty. Noel Palomado, iya ginpahayag nga makaduluda kun ngaa ginsaylo pa sang DOH ang binilyon nga pondo sa Pharmally.
Ang Pharmally suno sa abogado ang nakitaan nga wala sang track record, wala sang single completed largest contract sa gobyerno kag wala man sang net financial contracting capacity.
Indi man maathag suno sa iya kun paano gin-bid sang suppliers ang tuman kadako nga pondo sang gobyerno para sa ginprocure nga COVID-19 supplies.
Nahibaluan nga nag-ibwal ang Senate blue ribbon committee bangud sa kakulang sang memorandum of agreement sang gintransfer sang health department ang binilyon nga pondo sa budget department para sa procurement.
