Patay ang tatlo ka mga tawo sa Bicol Region bangud sa Bagyo Kristine.
Suno kay Police Brigadier General Andre Perez Dizon, director sang Police Regional Office 5, isa pa gid ang na-missing kag anom ka iban pa ang pilason.
Sa situation briefing kaupod si President Ferdinand “Bongbong” Marcos Jr., gin-report sang Office of Civil Defense (OCD) nga isa ka tawo ang napatay sa Palanas, Masbate matapos nadagdangan sang sanga sang kahoy.
Pito naman ang na-missing, lakip na ang tatlo sa San Fernando, Masbate matapos nagpangisda; tatlo sa Daanbantayan, Cebu; kag isa sa Pilar, Cebu.
Lima naman ka tawo ang pilason lakip na ang apat ka iban pa sa Northern Samar, kag isa sa Labo, Camarines Norte matapos naaksidente.
Samtang, manubo naman ang report sang National Disaster Risk Reduction and Management Council (NDRRMC), sa diin tatlo lang ang na-missing sa Bicol ag isa ang pilason sa rehiyon.
Samtang, nagdangat naman sa 382,302 ka mga indibidwal ukon 77,910 ka mga pamilya ang apektado sang Bagyo Kristine sa Bicol, Western Visayas, Eastern Visayas, kag Zamboanga Peninsula.
Gin-suspend naman ang byahe sang mga sakayang pandagat sa CALABARZON, MIMAROPA, Bicol, Central Visayas, kag Eastern Visayas
Apektado diri ang 4,753 ka mga pasahero, 703 ka rolling cargoes, 26 ka vessels, kag 13 ka motorized bancas.
Suspendido man ang klase sa 601 ka mga lugar kag ang 164 ka mga opisina sa gobyerno.
Nagdangat naman sa P169,685 nga balor sang ayuda ang napanagtag sa mga biktima sang bagyo.
