Patay ang tatlo ka sakay sang traysikol samtang isa naman ang pilason sang nabunggo ang traysikol sa isa ka fuel tanker sa Brgy. Carmelo, Banate, Iloilo.
Ang ginbawian sang kabuhi amo kanday Ariane Bactung San Miguel, 26-anyos, driver, samtang ang mga sakay amo kanday Rodolfo Baldevarona Bachar, 62-anyos, Rosana Paclibar Barba, 36-anyos.
Samtang nakagwa naman sa hospital ang manghod sang driver nga si Armefer Bactung San Miguel, 22-anyos, kag lunsay residente sang Brgy. De La Paz, Banate, Iloilo.
Ang driver sang fuel tanker naman amo si Joecie Aguilar Biana, 46-anyos, kag residente sang Brgy. San Lucas, Barotac Viejo, Iloilo.
Sa interview sang Bombo Radyo kay PMSg. Jhan Baylon, imbestigador sang Banate Municipal Police Station, iya ginpahayag nga idul-ong kuntani sang driver sang traysikol ang iya manghod sa terminal kag nagdungan sakay ang duha pa gid ka pasahero.
Samtang, halin sa Barotac Viejo naman ang fuel tanker kag madul-ong kuntani sang karga sini nga gatong sa Passi City.
Sang nag-overtake ang traysikol sa ginasundan sini nga motorsiklo, nagderetso ini sa dalan nga ginabanas sang fuel tanker.
Bangud sa kabaskugon sang ‘impact’ nagbulag ang motorsiklo sa side car sini.
Sa subong, ara sa kustodiya sang Banate PNP ang driver sang fuel tanker kag ginahulat ang desisyon sang pamilya sang mga sakay sang traysikol.
