Nagatingob-pwersa ang Philippine Coast Guard, Philippine Air Force, Philippine Army, kag iban pa nga rescue personnel agud makit-an ang pito mga persona nga nagapabilin nga missing matapos nagkapan ang duha ka mga motorbanca nga halin sa Boracay, Aklan kag pakadto sa Caluya Island, Antique.
Sa report sang PCG, anum ang sakay sang isa ka motorbanca, samtang 14 naman sa pihak nga sakayan.
As of press time, ang padayon nga ginapangita amo sanday:
- Vic Florendo – Bulao, Camarines Sur
- Roel Delloro – Mabini, Goa, Camarines Sur
- Joseph Delloro- Tingtingon, Goa, Camarines Sur
- Macmac Delloro – Tingtingon, Goa, Camarines Sur
- Frankie Gajero – Tigaon, Camarines Sur
- Rosauro Delloro – Tingtingon, Camarines Sur
- Christian Aguilar – (Inisyal nga impormasyon: taga-Manila)
Sa interview sang Bombo Radyo kay Raul Fernandez, regional director sang Office of Civil Defense Western Visayas, iya ginkumpirma nga tatlo ang napatay sa amo man nga insidente.
As of press time, ang na-report nga pangalan sang casualties amo sanday:
- Christopher Gajero – residente sang Tigaon, Camarines Sur kag ang bangkay nasapwan sa Brgy. Agojo, Looc, Romblon
- Marlon Belleca – residente sang Puting Kahoy, Silang, Cavite kag ang bangkay nasapwan sa Sitio Sto Nino, Pob. Looc, Romblon
- Isa pa ka tawo nga ang bangkay nasapwan sa Tigaon, Camarines Sur
Base sa imbestigasyon, nagaguwa nga ang sakay sang duha ka sakayan ang lunsay halin sa Equator Construction Company nga naka-base sa Caluya, Antique kag nagdesisyon nga mag-enjoy kuntani sang long weekend sa isla sang Boracay.
Nagguwa man sa pagpangusisa nga ang duha ka sakayan ang hungod nga naglikaw sa Coast Guard inspection kag clearance, buot silingon, indi ini otorisado nga magkarga sang mga pasahero.
Natukiban nga nag-agi ini sa nabaw-ing nga area sa Boracay partikular ang Angol Point, Brgy. Manoc Manoc, Malay, Aklan sang kaagahon agud nga indi ma-detect sang law enforcement officers apang sang Agusto 26, na-report sa otoridad nga natabo na ang amo nga insidente.
Sang amo man nga adlaw, gin-umpisahan gilayon ang search operations sa palibot sang Caluya Island apang bangud indi paborable ang kondisyon sa dagat, temporaryo nga gin-suspinde sang team ang operasyon sa gab-i kag nag-resume lang sang maayo na ang tyempo.
Magluwas sa rescue personnel, naka-isyu na subong ang otoridad sang Notice to Mariners (NOTAM) agud nga ma-alerto ang vessels sa area agud nga maka-provide man sang assistance kag maka-report kun may makit-an nga naangot sa sini nga insidente.##
