GUIMARAS – Ginpaidalom sa home quarantine ang tatlo ka personnel sang munisipyo sang Buenavista, Guimaras matapos nakapadulong sa St. Paul’s Hospital of Iloilo.
Sa interview sang Bombo Radyo kay Buenavista Mayor Eugene Reyes, iya ginpahayag nga gilayon ginmandu ang amo nga lihok bangud ginakahangaw-an nga posible naka-close contact sang mga ini sang walo ka COVID-19 positive nga mga doktor sa nasambit nga ospital.
Gin-disinfect man ang opisina sang amo nga mga personnel agud mapat-od nga hilway ang lugar sa virus.
Ginpahayag man ni Reyes nga mismo ang tatlo ka staff ang nagsugid sang ila travel history.
Nag-apelar ang alkalde sa iban nga mga pumuluyo sang Buenavista nga nakapadulong sa nasambit nga ospital sa syudad sang Iloilo nga kun mahimo, magpakig-angot sa otoridad kag magpaidalom sa home quarantine agud malikawan ang posible nga paglapta sang respiratory illness.
