Pilason ang tatlo ka mga tawo matapos nagluntad ang ginaalegar baisay kag rambol sa tunga sang duha ka grupo sa Calinog, Iloilo kadungan sang Byernes Santo.
Natabo ini sa Malagumpit River nga sakop sang Barangay Cahigon sa amo nga banwa.
Sa interview sang Bombo Radyo kay Police Major Miles Dieron, hepe sang Calinog Municipal Police Station, iya ginpahayag nga duha ang natiruhan, samtang isa naman ang may samad bangud sang pagpanglabo.
Ang napilasan sa pagpanglabo amo si alias Roque, 62-anyos, residente sang amo nga lugar.
Ang ginaalegar naglabo amo si alias Jose, 50-anyos, residente man sang amo nga lugar.
Suno kay Dieron, nasamaran man si alias Jose matapos natiruhan ini ni alias Anggay.
Magluwas sa ila, napilasan pa gid si alias JP, isa ka barangay kagawad, matapos nga natiruhan man sa amo nga insidente.
Lunsay na sila gindala sa ospital kag padayon subong nga ginabulong suno sa pulis. Ginpahayag pa nga indi man tuman ka daku ang ila mga pilas.
Suno pa kay Dieron, gindala ni alias Anggay ang armas sa iya nga pagpalagyo. Wala pa nahibaluan kun ano ini nga klase sang armas.
May isa ka menor de edad nga nakaangkon sang samad sa amo man nga insidente apang nakagwa na ini sa ospital. Gina-klaro pa kun paano sini naangkon ang iya samad.
Sandig sa imbestigasyon sang pulis, may daan na nga hiligut-anon sa tunga sang duha ka grupo kag sang nakit-anay sila sa suba subong nga adlaw, may natabo nga pagbaisay nga nagresulta sa rambol.
Sa video nga naglapta online, nakit-an nga napuhag ang iban nga nagapalaligo sa suba kasunod sang hitabo. Makit-an nga may mga menor de edad video, apang luwas naman sa katalagman.
Nahibaluan nga kinaandan nga nagatipon ang magpamilya kag nagakadto sa mga palaliguan sa Semana Santa magluwas sa pagbisita sa mga pilgrimage sites.#
