Nahatag na ang ginasinggitan nga hustisya matapos napamatud-an sa korte nga guilty ang tatlo ka anay kadete sang Philippine Military Academy (PMA) sa kamatayon sang kaangay man nila nga kadete nga si Darwin Dormitorio sang 2019.
Apang kun may isa man ka tawo nga wala nakasaksi sini nga hustisya, ini amo ang amay sang biktima nga si William Dormitorio, isa ka retired Army lieutenant colonel kag miyembro sang PMA Class of 1974, nga napatay sinemana antes mapaguwa sang huwes ang desisyon.
Ang 75-anyos nga amay ang nagtaliwan sang Hulyo bangud sa cardiac arrest — isa ka sirkumstansya nga amo ang nagdingot sa iya sang kahigayunan nga mabatyagan ang closure sa kaso sang iya 20-anyos nga anak nga napatay bangud sa hazing.
Sa verdict nga ginpagwa kahapon, ginpamatbatan ni Baguio City Regional Trial Court Judge Ligaya Itliong-Rivera sang reclusion perpetua ukon tubtub sa 40 ka tuig nga pagkapreso ang mga suspek nga sanday Shalimar Imperial, Felix Lumbag Jr. kag Julius Tadena bangud sa kamatayon ni Dormitorio.
Na-convict si Tadena bangud sa paglapas sa Anti-Hazing Act kag ginmanduan sang korte nga bayaran ang pamilya sang P2-million; samtang ang duha naman ang guilty sa murder kag violation man sa Anti-Hazing Act of 2018, kag ginpabayad sang P3-million kada isa.
Na-detain ang tatlo sa regional custodial facility kag ginalauman nga sayluhon sa New Bilibid Prison sa Muntinlupa.
Tumandok si Dormitorio sang Cagayan de Oro kag miyembro sang PMA Madasigon class of 2023.
Napatay siya sang Septyembre 18, 2019 sa PMA Hospital matapos nasapwan nga unconscious sa sulod sang isa ka hulot sa Mayo Hall sang PMA sa Fort Del Pilar.
Sandig sa record sa korte, ginkastigo si Dormitorio bangud nadula sini ang pares sang botas sang senior cadet.
Duha ka bulan pa lamang siya sa akademya sang tion nga natabo ang insidente.
Nadiskubrehan man sang otoridad nga isa ka bulan antes ang iya kamatayon, si Dormitorio kag iban pa nga bag-uhan sa PMA ang ginpwersa nga magpaidalom sa electrocution via taser kag iban pa nga physical abuse sa kamot sang ila upperclassmen.#
