Na-rescue sang otoridad ang mga pamatan-on nga ginapatihan nga myembro sang gang nga nagpatigayon sang initiation rites sa sulod sang Oton Public Cemetery.
Ang initiation rites ang nakuhaan sang video kag nakalab-ot sa atensyon sang otoridad gani gintinguhaan nga ma-identify ang mga ini rason nga ginpatigayon ang rescue operation.
Sa interview sang Bombo Radyo kay Police Lieutenant Colonel Abner Jordan, iya ginpahayag nga lunsay mga solterito nga nagaedad sang 15-anyos tubtob 17-anyos ang ila nga na-rescue.
Suno kay Jordan, base sa video, ginakastigo ang mga involved nga menor de edad bilang kabahin sang initiation rites.
Gin-refer naman sa Women and Children’s Protection Desk ang mga na-rescue nga pamatan-on para mapaidalom sa nagakaigo nga intervention.
Padayon naman nga gina-identify ang iban pa nga nakit-an sa video agud makadtuan sang otoridad.
