3 special non-working holidays sadto, nangin special working days sa mandu ni Pres. Duterte

Nabuhinan ang mga non-working days subong nga tuig bangud ang tatlo ka mga petsa nga madugay na nga nangin traditional holidays ang nangin “special working days” na sa mandu ni Presidente Rodrigo Duterte.

Ini ang nadesisyonan sang Presidente sa pagpati nga makabulig ini sa pagrecover sang ekonomiya sang pungsod gikan sa epekto sang COVID-19 pandemic.

Sa Proclamation 1107, ginhimo sang Presidente ang mga masunod nga petsa nga “special working days”;

*Nobyembre 2, 2021 – All Souls’ Day
*Disyembre 24, 2021 – Christmas Eve
*Disyembre 31, 2021 – New Year’s Eve

Ang mga nasambit nga petsa ang sadto anay gin-classify bilang special non-working days.

Suno kay Pres. Duterte, kinahanglan sang pungsod sang economic productivity sa diin ginhimo ang tatlo ka mga petsa nga special working days.

Nahibaluan nga ang ekonomiya sang pungsod ang nagnubo sa 9.5 percent sang tinalikdan nga tuig bangud sa lockdown sa diin naapektuhan ang mga negosyo kag mangin ang mga mamumugon ang nadulaan sang palangabuhian.