Tatlo tubtub apat pa ka mga bagyo ang gina-forecast nga magporma ukon magsulod sa Philippine Area of Responsibility (PAR) antes magtakop ang tuig 2025.
Sa interview sang Bombo Radyo kay Dr. Nathaniel Servando, administrator sang Philippine Atmospheric, Geophysical and Astronomical Services Administration (PAGASA), iya ginpahayag nga posible nga may isa ukon duha pa sa bulan sang Nobyembre, kag isa tubtub duha naman ka bagyo sa Disyembre.
Sa Nobyembre, nakalabay na si Bagyo Tino kag nagbilin sang masobra sa 100 ka mga patay; samtang nagahana naman nga magsulod si Severe Tropical Storm Uwan nga mahimo pa mag-develop sa isa ka super typhoon.
Malapad ang sirkulasyon ni Uwan kag apisar nga sa Northern Luzon kag Central Luzon ang laslasan sini, maapektuhan pati ang Visayas kun sa diin posible ang pagluntad sang baha, mudslides, kag landslides.
Isa sa ginalantaw nga nakaapekto sa kakusog sang bagyo suno sa PAGASA amo ang La Niña nga nagadala sang mabaskog nga hangin kag madamol nga ulan.
Oktubre 10 sang gin-anunsyo sang state weather bureau nga present ang La Niña conditions sa tropical Pacific Ocean halin pa sang Septyembre. Ang La Niña amo ang weather phenomenon nga characterized sang indi kinaandan nga mas malamig ipaangid sa average nga sea surface temperatures sa central kag eastern equatorial Pacific.
“Dahil super typhoon ito, inaasahan natin na may kalakasan ang pag-ulan,” suno kay Servando.
Ginapanawagan sini sa tanan nga magpreparar kag maghimo sang proactive measures, kag magpamati sa mga abiso sang PAGASA, local government units, kag mga concerned agencies.#
