ILOILO CITY – Nagpirma sang accession protocol ang 30 ka mga pungsod nga kaalyado sang North Atlantic Treaty Organization (NATO) para sa Finland kag Sweden.
Bangud sini, mahimo na nga makapasakop ang mga ini sa nuclear-armed alliance sa tion nga ma-ratify na sang parliament ang amo nga desisyon.
Ini ang ginakabig nga pinaka-significant nga expansion sang alliance humalin sang 1990s.
Ang pagpirma nga ginpatigayon sa NATO headquarters ang kasunod sang deal sa Turkey sang nagligad nga NATO summit sa Madrid kun sa diin, gin-lift sang Ankara ang veto sa Nordic membership bids matapos nga ang duha ka pungsod ang naghisugot nga tutukan ang pagbato sa terorismo.
Suno kay NATO Secretary-General Jens Stoltenberg, ang pagpirma sang accession protocol ang isa ka makasaysayan nga hitabo kag sa bangud 32 na ang myembro, labi pa nga magabaskog ang alyansa.
Bangud sang amo nga protocol, ang duha ka pungsod ang mahimo na nga mag-upod sa mga NATO meetings kag may mas dako nga access sa intelligence apang indi protektado sang NATO defense clause nga “an attack on one ally is an attack against all” tubtob nga indi ma-ratify nga ginabanta magalawig sang isa ka tuig.
Una na nga nagpaandam ang Russia sa duha ka pungsod sa pagpasakop sa alyansa.
Sang Marso 12, ginpahayag sang Russian foreign ministry nga may matabo nga seryoso nga military kag political consequences sa tion nga dayunon ini sang duha ka pungsod.
