Ginkumpirma sang Office of Civil Defense (OCD) nga nagsaka na sa 30 ang numero sang na-report nga napatay sa Pilipinas bangud sa pagbaha kag iban pa nga mga epekto sang Habagat kag sunod-sunod nga mga bagyo.
Suno kay OCD officer-in-charge Assistant Secretary Bernardo Rafaelito Alejandro IV, one-third sa sini nga numero ang na-validate na nga nagalakip sang siyam sa National Capital Region (NCR) kag duha sa Region III.
Kadam-an sa mga casualties ang tuga sang pagkalumos kag pagka-kuryente.
Sa pihak nga bahin suno sa opisina, 10 ang nasamaran kag pito ang missing apang subject pa ini sa validation.
Base pa sa updated report sang OCD, 5.2-million nga mga indibidwal ang apektado sang enhanced southwest monsoon kag halit nanday Bagyo Crising, Dante, kag Emong.
55,000 naman ka mga pamilya nga katumbas sang 200,000 ka mga indibidwal ang nagatinir sa 2,000 ka mga evacuation center.
Sa report naman sang Department of Agriculture (DA), nagdangat sa P5.2 billion ang balor sang halit sa imprastraktura samtang nagsobra naman sa P1.1-billion ang halit sa agrikultura.#
