Iloilo – Masobra sa 30% sang mga kabataan humalin sa kindergraten tubtob Grade 3 ang indi pa makihabalo maggamit sang tunog sang alpabeto kag magbasa tuga sang coronavirus disease 2019.
Ini ang resulta sang ginpatigayon ang Comprehensive Rapid Literacy Assessment sang United States Agency for International Development sa mga eskwelahan sa Rehiyon 5 kag 6.
Sa interview sang Bombo Radyo kay Ina Aquino, United States Agency for International Development Chief of Party for ABC+ Project, iya ginpahayag nga dako nga problema nga wala sang manunudlo nga mahimo magtudlo sa mga kabataan ilabi na sa pagproseso sang mga natun-an.
Suno kay Aquino, tuman ka importante nga may nagabulig sa mga kabataan bangud ini ang lebel sang ila formative years.
Ginpahayag dugang sang natungdan nga tinutuyo sang ahensya nga pasangkaron ang ihibalo sang mga bata sa paggamit sang lenguahe paagi sa mga interventions kaangay sang nagakaigo nga trainings para sa mga manunudlo kag pagpanagtag sang mga libro sa mga bata nga mahimo makaengganyo sa ila nga magbasa.
