ILOILO CITY – Nagdangat pa sa 73.5% ukon 31,058 nga mga traditional jeepneys sa Metro Manila ang wala sa gihapon na-consolidate, pila ka adlaw antes ang Disyembre 31 nga deadline para sa consolidation sang public utility vehicles bilang kabahin sang public utility vehicle modernization program.
Suno sa Land Transportation Franchising and Regulatory Board, ang masobra sa tatlo ka libo nga jeepney ang mahimo nga makuha-an sang ila prangkisa sa tion nga magtakop na ang deadline.
Kun basehan ang nationwide data, 30% pa sang mga jeepney units ang wala naka-comply sa consolidation deadline.
Ang mga jeepney drivers kag operators ang dapat nga mag-upod ukon magtukod sang mga kooperatiba sa idalom sang modernization program nga may katuyuan nga maislan ang mga traditional jeepneys sang environment-friendly vehicles.
Una na nga ginpahayag ni President Ferdinand Marcos Jr. nga wala na sang extension pa sa year-end deadline kasunod sang pagsinapol upod sa transport officials.
Sa bahin naman sang grupo nga Pagkakaisa ng mga Samahan ng Tsuper at Operator Nationwide ukon PISTON, nagalaum sila sa gihapon nga makapagwa ang Korte Suprema sang temporary restraining order batuk sa pagpatuman sang modernization program.
Sang nagligad nga semana, ang Piston upod sa iban pa nga grupo ang nag-file sang petition sa High Court nga nagahingyo nga mapa-untat ang pagpatuman sang amo nga programa.
