Wala sang pamilya ukon ginikanan sang mga pulis ang nakasulod sa Camp Martin Delgado agud magtambong sang oath taking sang mga bag-o nga pulis sang Police Regional Office (PRO-6).
Sa interview sang Bombo Radyo kay PCol. Gilbert Gorero, tagpamaba sang Police Regional Office (PRO-6), iya ginpahayag nga bilang pagsunod sa protocol, wala ginpahanugutan nga makasulod sa kampo ang mga pamilya sang pulis agud malikawan ang pagginutok ilabi na subong nga may pandemya.
300 ka mga pulis ang kabahin na sang PRO-6 sa diin 255 ang lalaki kag 45 ang babaye.
Suno kay Gorero, may yara naman sang 16 ka mga pulis ang dal-on sa bahin sang Police Regional Office 8.
Bilang bag-o nga pulis, makabaton ini sang P29,668 nga sweldo magluwas sa mga allowances nga mabaton.
Samtang ginpatigayon man ang donning of rank para kay Gorero halin sa Police Lieutenant Colonel kag subong nangin Police Colonel na.
Suno kay Gorero, bag-o nga pagpanghangkat kag dako nga responsibilidad ang iya tungdan subong nga nag taas ang iya ranko.
Ginpasalamat man ni PCol. Gorero ang iya pamilya kag ang Police Regional Office 6 sa suporta kag pagsalig nga ginhatag sa iya.
Si Gorero ang nagaserbe bilang acting chief sang Regional Plans Strategy Management Division, Officer-in-charge sang Regional Public Information Office kag acting chief man sang Regional Police Strategy Management Unit.
