ILOILO CITY – May yara na ang duta nga mahimo patindugan sang Disaster Risk Reduction Command Center sa syudad sang Iloilo.
Sa interview sang Bombo Radyo kay Iloilo City-Mayor elect Jerry Treñas, iya ginpahayag nga may yara na sang 300 sqm nga duta sa Sen. Benigno Aquino Jr. Avenue nga amo ang patindugan sang apat tubtub lima ka panalgan nga command center.
Suno kay Treñas, ang isa ka panalgan ang igatigana para sa traffic command center agud nga magbantay sa dalagan sang trapiko sa syudad sang Iloilo.
Kadungan sini, ginkumpirma ni Treñas nga magapadala sang traffic experts si Metropolitan Manila Development Authority (MMDA) chairman Danilo Lim agud nga tun-an ang traffic situation sa syudad.
Nakadepende naman sa rekomendasyon sang MMDA traffic experts kun ano ang mangin plastada sang pagatukoron nga traffic command center.
May kaangtanan naman sa natabo nga aksidente sang damlag lang, ginpahayag sang natungdan nga nagpangayo sang bulig ang pamilya sang mga biktima agud nga mahatagan sang hustiya ang kamatayon nanday Alnie Dinah kag Joe Marie Osano.
