Ginalauman nga 30,000 ka mga miyembro ni Iglesia ni Cristo halin sa Panay ang magatipon sa Iloilo Freedom Grandstand sa City Proper umpisa 6:00 subong nga aga tubtub alas sais karon sa gab-i para sa “National Rally for Peace.”
Lakip sa magatambong amo ang 4,000 halin sa Antique kag northern Iloilo, tag-5,000 halin sa Aklan kag Capiz kag 12,000 halin sa southern Iloilo.
Kahapon kag kagab-i, madamo na ang nag-abot sa syudad agud mag-set up sang venue para sa bilog nga adlaw nga mga aktibidad subong nga Lunes, Enero 13. Ang iban naman ang nagpaligad na sang gab-i sa hotels para mas temprano sila nga makaabot sa venue subong nga aga.
Sa interview sang Bombo Radyo kay Minister Troy Calimpong sang Christian Family Organization sang INC Iloilo District, iya ginpahayag nga may yara sang entertainment kaangay sang pagkanta kag lantawon man nila ang peace rally sang iban nila nga kaupdanan sa iban nga sites sa Pilipinas.
Ginpahayag sini nga nagsunod sila sa tanan nga proseso kaangay sang pag-secure sang permit.
Ginpaathag man sini nga ang tuyo sang “National Rally for Peace” amo nga suportahan ang pahayag ni President Ferdinand Marcos, Jr. nga indi na lang mag-file sang impeachment complaints batok kay Vice President Sara Duterte.
Matandaan nga ginsuportahan sang INC ang UNITEAM ukon tandem nanday Marcos kag Duterte sang 2022 elections.
As of press time, tatlo ka impeachment complaints ang ginapangatubang ni Sara nga lunsay nag-ugat sa kontrobersyal nga confidential funds sang Office of the Vice President kag Department of Education (DepEd) nga iya man anay ginpamunuan antes siya nagbiya sa Gabinete ni Marcos.
